ភ្នំពេញ៖ លោក វេង សាខុន ត្រូវបានព្រះមហាក្សត្រតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី។ នេះបើតាមព្រះរាជក្រឹត្យរបស់ព្រះមហាក្សត្រដែលចេញផ្សាយនៅរសៀលថ្ងៃទី១១ ខែតុលា ឆ្នាំ២០២២។
ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភ្នំពេញអន្តរជាតិ នៅព្រឹកថ្ងៃទី១១ ខែតុលា នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាក់ថា នៅថ្ងៃនេះសម្ដេចបានថ្វាយលិខិតជូនព្រះមហាក្សត្រដើម្បីតែងតាំងលោក វេង សាខុន ធ្វើជារដ្ឋមន្ត្រីប្រតិភូអមនាយករដ្ឋមន្ត្រី បន្ទាប់ពីត្រូវបានដកដំណែងពីរដ្ឋមន្ត្រីកសិកម្មកាលពីថ្ងៃទី០៨ ខែតុលា ឆ្នាំ២០២២។
សម្ដេចតេជោ ហ៊ុន សែន បានមានប្រសាសន៍ថា សម្ដេចមិនបោះបង់អ្នកណាទេក៏ប៉ុន្តែត្រូវការអ្នកទទួលខុសត្រូវលើវិស័យនេះដើម្បីជំរុញវិស័យកសិកម្មឲ្យរីកចម្រើន។
លោក ឌិត ទីណា រដ្ឋលេខាធិការក្រសួងរ៉ែ និងថាមពល ត្រូវបានរាជរដ្ឋាភិបាលដាក់ស្នើទៅសម្តេច ហេង សំរិន ប្រធានរដ្ឋសភា ដើម្បីបោះឆ្នោតឲ្យលោក ឌិត ទីណា ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសលោក វេង សាខុន។
គណៈកម្មាធិការអចិន្ត្រៃយ៍រដ្ឋសភា នឹងត្រួតពិនិត្យលើសំណើនេះនៅថ្ងៃទី១៣ ខែតុលា ឆ្នាំ២០២២ វេលាម៉ោង៩ព្រឹក៕
